Tepas Pangacaprukan LieZMaya.Web.ID | Blog Urang Sunda Asli!

Puncak Lembur Gentong

2009-11-30T21:03:00.002+07:00

Kampung ieu mun di béh lembur simkuring (Cidodol – Rancakole) nu lumayan terkenal ayeuna teh, ti baheula keneh tos kakoncara ketang lamun sakadar diantara urang urang lembur daerah Bandung selatan mah, mun aya nu nanyakeun gés kasebut "moal bireuk deui ceunah!".

Tah ceunah mah baheulana ceuk beja eta leumbur teh naha bét disebut Gentong, nyaeta kusabab aya hiji gentong nu di jién ku para masyarakat pupuhu baheula nu kacida gédena (sagéde imah saung) tina taneuh liat ku masyarakat sésépuh baheula pikeun nampung/ nemperken cai paragi keperluan masyarakat didinya keneh.

Ngan hanjakal ayeuna mah da eta géntong teh tos teu aya, peupeus teu kuat ku jaman atawa aya nu ngarusak, atawa kumaha wallohu'alam. Simkuring oge teu acan kungsi ninggal di kieuna eta gentong teh. Munggaran nincak eta lembur mun teu salah mah basa nuju kelas 5 SD, basa ku pun rama diajak jalan - jalan hiking mapay rute ka bumi pun eyang nu aya di lembur Jelekong (pipireun Gunung geulis)...da saupamina bade motong jalan beh tereh, ieu Jalan gentong teh bisa jadi alternatif, teu kudu nguriling heula ka lebah Ciparay - jalan laswi, atawa Arjasari - Banjaran...ngan hanjakal na teh jalanna masih keneh rarinjul butut, teu acan kantos diaspal paten hehe.

Sababaraha bulan katukang ceunah mah ceuk béja ti urang lembur, Gentong teh ayeuna tos lumayan rame, unggal poe minggu teh sok jadi tempat pangpiknikan jalma - jalma nu rek jaralan jalan, arolah raga lari/ jogging sabari balanja/ jajan sagala rupa di Gentong teh, sabab aya oge tukang dagang nu ngalampar jualan didinya teh, nu biasa disebut "pasar tonggeng/ pasar kaget" tea. Nyaeta pasar saaya - aya dadakan nu ayana teh ngan sakeudeung/ teu unggal poe...jadi sumber panghasilan neangan rizki oge pikeun tukang dagang atawa masyarakat di daerah sapanjang jalan ka arah puncak Gentong...ampir mirip jéng pasar kaget tugu Baleendah tea, nu sok pinuh ku tukang dagang.

Kadinya teh meren ngan sakur ngucurkeun kesang jang olah raga, sabab jalanna nanjak pisan pagunungan "tiriss" atawa aya oge nu ngahaja ngadon mékél botram muka timbel di puncak Gentong teh niggali pamandangan sababaraha gunung garede diantarana Gunung Geulis, Gunung Nini, Gunung Wayang (mun teu salah mah), jarakna ti lebah Cangkring teh/ jalan raya laswi Ciparay - Baleendah sakitaran 2-3 KM, endahna ninggali gunung Geulis nu nutupan sababaraha hiji lembur Bandung...turun ka beulah handap bisa eces ninggali Gunung payung cangkring (hiji gunung nu aya di lembur cangkring anu lamun ditilik – tilik ti kajauhan teh nyarupaan payung.

Lamun pareng kér halodo saupamana keur waktu rurusuhan bade ka lembur Jelekong (lembur pun eyang), simkuring sok motong jalan ngangge motor motong jalan ka puncak Gentong teh...lumayan tereh, mung sakur satengah jam. Kungsi oge basa baheula téh basa diajak ku pun rama mapay – mapay lembur hiking ngabeakén waktu dua jam kurang leuwih. Da lamun mapay jalan laswi mah nguriling ampir kana sajam we kirang lebih (make motor). Jéng kamari ieu teh ninggal di sisi jalan parantos aya bahan keusik, batu, jst jang ngomean/ ngalémésan jalan...sugan we atuh pamarentah merhatikén potensi pariwisata lokal ieu, jabaning da ceuk béja mah di dékéteun puncak Gentong teh aya hiji curug nu disebut Curug Cangkring nu lumayan endah lamun pareng usum mijih mah cénah (teu acan kantos ngabujéngan atuh da hehe).

Foto foto gambar di candak dina wanci jam 3 sore keur mangsa ceudeum di puncak lembur Gentong...dina motor, hampura rada rumeuk ngablur da motona ge bari dugdeg luhur motor rarinjul hahay!

Cag ah…baktos simkuring,

Lilis Mayasari/ LieZMaya.Web.ID.

Kacang Bulu

2009-11-25T22:30:00.002+07:00

Ieu katuangan jaman purbakala…maksadna salah sawios katuangan karesep basa kapungkur nuju alit. Di lembur mah disebatna teh kacang bulu…pami basa indonesiana mah naonnya? kacang kedelai tea panginteunnya? bakatku tos lami tara mendakan deui…pek kamari ieuh basa kaleresan dijalan sarantos ngajajapkeun pun alo ti sakolana ninggal tukang jagong. Beu ku haripeut pas ninggal sababaraha beungkeut kacang bulu nu nyesa…mung kantun aya tilu bengkeut deui, sabeungkeut pangawisna dua rebuan.

Alhamdulillah ya Alloh meni asa mendakan naoooooon kitu, nuangna meni ku bungah…bari ngemut – ngemut mangsa katukang basa nuju jaman bubulucunan sareng rerencangan di sawah heuheu…teu hilap dugi ka ayeuna.

Wilujeng lebaran haji/ Idul Adha lur! (kangge para wargi nu ngalaksanakeun), simkuring bade mulang heula ka lembur (Bandung) heula nya’…nitipkeun ieu kaca sunda pangacaprukan simkuring ieu hehe :)

Cag ah, baktos simkuring.

Gallery Kujang Sunda (Jawa Barat)2

2009-11-16T19:06:00.002+07:00

Neraskeun postingan Kujang kamari Alhamdulillah aya respon ti administrator kujangpamor.com langsung, nambihkeun gallery kujang anu langkung lengkep (Hatur nuhun pisan), kumargi seer, ku simkuring dijantenkeun album Gallery bae, sumangga bae saupamina bade copy paste gambar atanapi content wajib nyeratken sumberna, nyaeta: - Kujangpamor.Com -

View Full Album

Teu hilap dihandap ieu aya katerangan nami - nami bagian tina KUJANG nu langkung jentrena:

- Baktos simkuring, Lilis Mayasari/ LieZMaya -

Gambar: Kujangpamor.com (Kang Igus nurapratama), Hatur nuhun pisan. Hapuntén boh bilih aya kalepatan dina artikel nu parantos disérat ku simkuring diluhur.

Kujang Sunda (Jawa Barat)

2009-11-15T20:19:00.004+07:00

Kujang nyaéta hiji pakarang nu mandiri nu asalna ti wewengkon Jawa Kulon. Kujang munggaran dijieun kira-kira abad ka-8 atawa ka-9, dijieun tina beusi, waja sarta bahan pamor, panjangna kira-kira 20 nepi ka 25 cm sarta beuratna kira-kira 300 gram.

Kujang mangrupa pakakas anu ngagambarkaeun kaseukeutan sarta daya kritis dina kahirupan ogé perlambang kakuatan sarta wawanén pikeun nangtayungan hak sarta ngadegkeun bebeneran. Dina jaman bihari pakakas ieu ngan dipaké ku golongan tinangtu nyaéta para raja, prabu anom, golongan pangiwa, panengen, golongan agamawan, para putri sarta golongan kaum wanoja pinilih, sarta para kokolot.

Dina Wacana sarta Khasanah Kabudayaan Nusantara, Kujang diaku minangka pakarang tradisional masarakat Jawa Barat (Sunda) sarta Kujang dipikawanoh minangka pakarang anu ngabogaan nilei sakral sarta miboga kakuatan magis atawa kakuatan ghoib. Sabagian nu naliti nyébutkeun yén istilah Kujang asalna ti kecap Kudihyang jeung akar kecap Kudi sarta Hyang. Kujang (ogé) asalna ti kecap Ujang, anu hartosna manusa atawa jelema. Manusa anu sakti lir ibarat Prabu Siliwangi. Manusa anu sampurna dihareupeun Alloh sarta miboga derajat Ma'rifat anu luhur.

“…Ganjaran nu belapati, satria santosa iman, Raden teu burung dileler, jimat kujang nu utama, pikeun neruskeun lampah, pangjurung ngapung ka manggung, pamuka lawang ka Sunan. Cangkingan lalaki langit, wangkingan lalanang jagat, wewesen leber wawanen, saratna sapira kujang nanging jadi lantaran, Sunan Ambu mikayungyun, para jawara ngaraksa. Kujang the dipake ciri, pusaka Tanah Pasundan, ciciren gede wewesen, pantang lumpat ngandar jangjang, ngeok eleh ku bikang, saur galur nu cacatur, kujang dua pangadekna…”

Ampir sabagian ti masyarakat Jawa Barat apal kana kujang. Tapi, teu loba ti maranéhanana anu nyaho leuwih jero latar sajarah atawa simbol - simbol hartian di balik kujang (kalébét simkuring pribados pangintén hiks...). Kujang ngan nu di pikanyaho teh ngan saukur sawatés sajenis pakarang has Sunda jéng wangun anu ngabogaan tungtung nu seukeut/ runcing. Saleuwihna meureun, Kujang ngan dipikanyaho minangka lambang pamaréntah Propinsi Jawa barat wungkul atawa sanjata khas Sunda.

Alhamdulillah dugi ka deungeut ayeuna sanajan teu acan ngagaduhan Kujang dibumi “sakadar kangge cindera mata hiasan dina tembok tapi simkuring parantos ninggal tur nyépég langsung eta sanjata has sunda teh” basa dina kasempetan ngiriungan ririuangan di Bandung, buatana Bapak Hadian Wasita Saleh – Dosen ITENAS (Institut Teknologi Nasional), atanapi nu akrab disapa Kang Hadian, sareng simkuring gaduh dua tawis katinéng “leres kitu istilahna? Hehe” dua Bros kujang warna emas ti salah sawios pangurus situs www.kujangpamor.com , hatur nuhun :P

Mangga saupamina para dulur – dulur ngagaduhan minat hoyong terang langkung jero ngenaan Kujang tiasa ngabujéngan bae situsna di Www.kujangpamor.com sakantenan tiasa oge pesen/ balanja online kujang dina situs pengembangan budaya kujang eta.

Cag ah, InsyaAlloh sanes waktos dicukruk langkung jero.
Baktos simkuring, Lilis Mayasari/ LieZMaya.
Gambar: Kujangpamor.com (Kang Igust nurapratama, dokumentasi simkuring pribados.Sumber ti sababaraha rujukan Website dina Google

Hapuntén boh bilih aya kalepatan dina artikel nu parantos disérat ku simkuring diluhur.

Download Mp3 Kacapi Suling

2009-11-07T23:26:00.004+07:00

Postinga ieu mung sakur bade masihan sakedik bongbolongan...Mangga boh bilih aya para wargi sadaya nu meryogikeun download kacapi suling Jaka sunda, kacapi suling Cianjuran, Kacapi suling Gupay Sarakan, kacapi suling suara parahyangan, kacapi suling sabilulungan, kacapi suling album kotras suling, kacapi suling Arum bandung, tengah peuting, es lilin, bajing luncat, jeng sajabana...tiasa langsung tepangan bae kaca http://tinyurl.com/kacapisuling

Image: Kabumi.Org

Bobodoran Sunda: Mahugi

2009-10-31T00:16:00.001+07:00

Si nini olohok mata simeuteun basa ningali siaki ngadadak jadi gagah tur gandang, make calana jin belel lebah tuurna ngahaja cena ewol ewolan, kaluhurna make kaos oblong anu aya tulisan,

"Urang sunda ulah heuay wae EUY!" hadiah agustusan ti cep Kendi anu gaduh kios di jalan Suci. Sirahna dibengker ku slayer warna bodas polet beureum, make kacamata cengdem meunang meuli ti padagang asongan anu mangkal di terminal Cicaheum.

"Anjiir aki meni edun kitu, nek kamana ki ?" tanya sinini. "Puguh aki teh nek lalajo arak arakan tujuh belasan ka alun alun !" tembal siaki bari singkil.

"Har pan arak arakanana ge lila keneh, alesan we...boa boa nek nguliwed siaki mah !" sinini curigeisen.

"Puguh meumpeung salse, jeung deui meungpeung alun alunna lowong keneh, bari sakalian nek nepungan cep Kendi nek ngaralat ukuran kaos nu dipesen, da sugan teh aki teh lintuh boro boro pesen ukuran XL bule, sihoreng teh ukuran S ge logor !"

"Mangkana ari jadi jalma kudu ngukur kakujur !"

"Heueuh..rarasaan teh ngora keneh,tapi najan casingna geus peot, ari ringtone-na mah,aki teh masih ngoncrang keneh, tahan banting deuih ngalawan abg lima aki teh sanggup keneh !"

"Hmmh...jig jig kadituh ari nek indit mah ulah loba pancarakem !" ceuk sinini bari jebi. Gandeang siaki muru ka pipir nuju ka tempat cocoanana anu diparkir di gigireun paranje, gerung gerung nyelah harley davidsonna, ceklak ditaekan,knalpotna mulek ngaluarkeun aseup minuhan jalan anu kaliwatan. Diparapatan ngarandeg sakeudeung, terus rurat reret ka lebah gardu ronda paragi barudak ngumpul ngadon garigitaran.

"Tuh geuning cep Kendi kabeneran pisan !" gerentes siaki bari muru gardu.

"Akiii..ha wa yu aki ?" ceuk cep Kendi satengah ngagorowok. "Ari awak mah cageur cep...ngan kahayang loba keneh anu can kalakonan ieu teh!".

"Nya hoyong naon deui atuh ki, harta aki mah tos balatak, incu pon kitu deui, hoyong naon deui ?"

"Lain kitu euy...pan nagara urang teh geus merdeka 58 taun lilana, tapi hasil tina kamerdekaan eta geuning can walatra,balukarna aya nu hayang pisah ti RIT,ahirna geuning papasean we jeung dulur sorangan, tah aki teh embung ningali nagri urang nu meunang hese cape ngarebut ti leungeun panjajah nepi kaayeuna ngan pakucrut wae, kieu kieu ge aki teh baheula ngilu barjoang najan modal ngan ukur bedil angin buatan Cipacing,tapi ku tangtara nipon mah aki teh dipikagimir !"

"Percanten ari kitu tea mah...ari aki teh bade kamana ?" cep Kendi unggut unggutan dituntungan ku nanya ka siaki.

"Puguh aki teh ngahaja nek ka hidep bari sakalian JJS,tapi kaparengan papanggih didieu !"

"Aya peryogi naon kitu ?"

"Nek ngaralat pesenan kaos tea, tina XL ganti ku S leungeun pondok hiji, tah ditambah ukuran M lima siki mah !"

"Nya nu limana kanggo saha ki ?"

"Ssstt..tong tarik teuing bisi kadengeeun ku sinini...kamari teh dipengkolan jalan aya nu kulap kelep we ka aki, meh tereh ngagentewel nek dipahugi kaos itung itung kenang kenangan!"

"Ari sesana ?"

"Sesana jeung mahugi oge, mun engke aya wanoja datang dina kongres... sakali deui omat ulah rea beja ka si nini... gawat !"

"Ari eta saha nu tukangeun aki...?" ceuk cep Kendi serengeh bari nunjuk kanu ngabedega bari mulak cangkeng.

"Balik siah...aki aki tujuh mulud !" sinini kekerot bari ngajiwir ceuli siaki.

Hauahahaha nyeri kulit patuangan, mangga bilih bade ngaos bobodoran sunda nu sanesna lumpat bae ka Ketawa.Com

Pacici - cici Putri, Kaulinan Barudak Sunda

2009-10-27T23:06:00.004+07:00

Ieu gambar teu nyarambung sareung topik Neng?
Muhun wiosnya...da sabab teu gaduh poto ramo - ramo panangan anu nuju anyang - anyangan pacici cici putri atuh da...sakanteunan narsis majang ramo panangan leuntik simkuring nyepengan kembang warna bungur basa amengan ka Bogor :P *haha tong sirik*

Inget mangsa katukang basa kuring olol leho keneh *can aya nu bogoheun harita teh haha* jéng babaturan teh sok loba kaulinan nu dipika resep teh, mun bosen nu ieu, nya ganti ku itu, mun bosen nu itu kari w ganti ulin nu itu. Tah ulinna mun paréng istirahat sakola atawa balik sakola samemeh indit sakola agama atawa ngaji ka masjid. Tataros ka mang google mendakan postingan edun ieu, mangga di aos bae...derrrr ah barudak!

Bada Isa Mang Sa'i diuk di tengah imah bari ngabaheuhay, sukuna nyanghunjar lambar, ngareureuhkeun capé tas baranggawé. Pamajikanana keur ngécos, ngérodan baju barudak na deukeut cempor.
"Cing Inah aya kénéh bubuy sampeu téh?" Mang Sa'i ka anakna nu cikal, anu umurna nincak 8 taun jalan.
Inah ngaléos ka dapur, hideng mangnyokotkeun bubuy sampeu tina catang hawu, citéh haneut dina téko jeung gula beureum meunang ngurud, dipiringan. Golosor dikahareupeunkeun bapana.
Indungna jongjon kékécos, bapana jongjon ngopi cacamuilan, bubuy sampeu dicocolkeun kana kurud gula disurung ku citéh haneut. Sakeudeung sakeudeung diselang ku imut ngagelenyu, ngadéngé barudakna sadulur-dulur, Inah, Titi jeung Didi ngariung di juru imah, anteng pacici-cici putri. Pikaseurieun ku kekecapan Inah, anu jadi luluguna.
Inah jeung Titi diukna émok, Didi sila andekak.

Dampal leungeun Titi jeung Didi disodorkeun duanana kénca-katuhu, ditangkubkeun sina antel kana palupuh, tuluy ditunjukan, ditetel-tetel ku curuk Inah bari ngawih:
"Pacici-cici putri
térélék kembang celempung ada nona ada tuan
kalau mau kembang apa........?"
"Hayang kembang naon?" cék Inah nanya ka Titi bari nyekel kana leungeun katuhu Titi.
"Hayang kembang sebé........!" témbal Titi.
"Heeh........kabogohna ka anak Mang Lebé ... !" ceuk Inah bari tuluy nyekel leungeun katuhu Titi téa sina nyangsang kana taktak.
"Héhéhéh........" Didi seuri. “Aduuuh........ kabogohna anak Mang Lebé cenah .... ! Héhéhéh ....”
"Keun baé atuh, naha........!" cék Titi anu boga rasa dijangjaruhkeun, bari seuri merong ka Didi.
"Sok urang tuluykeun........!" cék Inah bari ngawih deui:
"Pacici-cici putri
térélék kembang celempung ada nona ada tuan
kalau mau kembang apa?
"Hayang kembang naon?" bari nyekel leungeun Titi nu kénca.
"Hayang kembang bakung........!" cék Inah bari menerkeun leungeunna sina nyekelan taktak anu sabeulah deui.
"Heeh, kabogohna Tua Kampung."
"Sing rékép nya, ulah lésot! Ayeuna kari Didi"
Pek deui Inah ngawih saperti tadi ditungtungan ku nanya, "Hayang kembang naon?"
"Hayang........hayang........hayang .... kembang hérbras!" Didi ngajawabna rada agag-agagan.
"Heeh........alus, kabogohna urang Cibodas!" Didi jigrah, bari reureundeukan, tuluy nyangsangkeun leungeun kéncana kana taktak katuhuna, miheulaan parentah lanceukna nu ngaluluguan.
"Sok hiji deui, leungeun Didi nu kénca, encan..," cék Inah bari ngong ngawih deui. Tamat ngawih, pok nanya deui, "Hayang kembang naon?"
"Eu........eu........hayang kembang jalantir........!"
"Tah, kabogohna anu musapir!" témbal Inah.
"Ah embung nu musapir mah, da urang mah hayang beunghar!" cék Didi bari nyentak ka lanceukna.
"Heeh, heug, ganti atuh........jaga bakal jadi supir........!" cék Inah. Didi seuri atoh, indung bapana patingbelenyéh, kayungyun.
Sanggeus Titi jeung Didi pada-pada nyarangsangkeun leungeunna kana taktak masing-masing, tuluy Inah nanya deui ka Titi bari nyampaan siku, sirah, irung, panon, halis jeung buuk Titi.
"Ieu naon?" cék Inah kana siku Titi.
"Congcot!" témbal Titi.
"Ieu?" kana sirah.
"Gunung!"
"Ieu?" kana irung.
"Hawu!"
"Ieu?" kana panon.
"Lampu!"
"Ieu?" kana halis.
"Hileud!"
"Ieu?" kana buuk.
"Sapu!"
Geus kitu Titi téh sina meungpeun ku dua leungeun tuluy ditanya deui ku
Inah, "Nini! Nini! Aya Mas Giman bieu ngaliwat?"
"Aya!" témbal Titi.
"Mawa naon?"
"Mawa nangka........!"
"Nangka........raaaak........!" cék Inah bari ngajengkangkeun Titi sina nangkarak.
Barudak saleuseurian tingbarakatak. Tuluy deui Inah nanya ka Titi anu geus meungpeun sakali deui, "Nini ! Nini ! Aya Mbok Ayu bieu ngaliwat?”
"Aya!"
"Ngagandong naon?"
"Ngagandong jajamu!"
"Jamu........rauuuulll!" cék Inah.
Tuluy Titi disurakan ku Didi, "Euleuh jamuraul! Euleuh teu boga kaéra!"
"Keun baé da bobodoan barina ogé, naha........!” ceuk Titi.
"Ayeuna Didi" cék Didi bari nangkeupkeun leungeun kénéh kana taktakna sina ditataan ditanyakeun naon-naonna, tina siku dipapay nepi kana buuk ku Inah, saperti basa ka Titi. Tamat éta, Didi tuluy meungpeun, terus ditanya ku Inah, "Aki! Aki! Aya Mang Usa bieu ka dinya?"
"Aya........!"
"Nanggung naon?"
"Nanggung gula!"
"Gu........la........wing........!" Inah nyekelan leungeun Didi duanana, tuluy digulawingkeun, dijangjang-dijungjungkeun, bari nangtung.
"Aduh! Aduh! Nyeri, mani ngaderekdek ....! Luhur teuing ngajungjungkeunana Si Euceu, siah .......!” cék Didi bari lewa-lewé.
"Sugan téh teu nyeri. Maap, nya, kalepasan!” Cék Inah. “Ganti baé ku tatarucingan, saha nu pinter neguhna, cing........" Inah ngabangbalérkeun Didi anu rék ceurik téa.

Kaulinan Barudak Sunda Dina Wanci Burit.

Versi tembang Kaulinan Pacici cici putri teh bentén – bentén da, sapertos simkuring basa alit mah lirikna teh,
“Pacici cici putri, si putri anteur ka cai...
Ah embung...ah embung sién aya nu kamari” kitu taaaah.
Duh hatur nuhun pisan yeuh meni asa ku waraas nyeblak kana hate, carita duluhur di candak ti sunda Blogger.

Gelo Ku Anu Kagegeloan

2009-10-24T22:14:00.006+07:00

“Ieuh, ari maneh daek kawin ka si Nendah teh naha kusabab naon?” tanya Bi Ecin
“Naha kitu bi?” tembal Jang Riki
“heu ibi mah ku ho’okeun we maneh ujug – ujug bét daek, pan ti baheula teh maneh keukeuh embung dijodokén ka budak eta téh”
“Ah teu kunanaon bi, ngan babalik pikir we...asa era karunya ka manehna nu ti bahéla teu bosen – bosenna nungguan Iki”
“Naha kumaha atuh jéng si Neng Eulis?”
“geus bi ah tong nyeubut – nyeubut deui ngaran si Eulis bi....liér!” Jang Iki tuluy ujung – ujug ngaléos ti dapur ngajauhan Bi Ecin
“Haar rek kamana atuh Jang? Ieu sangu gés asak, urang tuang”
“Ka bumi Oni heula, rek mulangkén PSP”
“Burukénnya, bisi kaburu tiis” Bi Ecin ngingetkeun.
“Muhun...” tembal Jang Riki, bari tuluy manehna teh nyokot PSP ti kamar ngabélécét ka luar nutupkeun panto rada tarik luncat ka imah Jang Oni babaturanana.

Jang Riki atawa nu sok disebut Iki teh nyaeta anak kukutan Bi Ecin ti umur sapuluh taun, saprak bapana maot gara – gara sok mabok. Indungna Jang Iki nu ngarana Epong nu kabeneran ngabogaan rupa nu gélis téh tuluy nekad indit ka Arab jadi TKW ninggalkeun Jang Iki ka bi Ecin, unggal dua bulan sakali sok dikiriman duit jang kaperluanana. Nincak Umur 20 taun indung Jang Iki tuly maot gara – garana jadi korban kabiadaban dununganana di Arab.

Sabulan deui Jang Iki geus boga tekad rek kawin jeung Neng nendah, manehna dilamar ku bapana Neng Nendah, heu memang ilaharna mah lalaki nu ngalamar awéwé, tapi da karna ku kaayaan Neng Nendah nu kacida mikabogoh Jang Iki nepika ceuk paribasana mah “kagegeloan” kapaksa kulawargana Neng Nendah teh sababaraha kali menta Jang iki pikeun narima cinta Neng Nendah.

Tadina mah Jang Iki teh kékéh embung kusabab hatena gés nyantel ka Neng Eulis nu dipicéngcém ti lélétik, ngan hanjakan Neng Eulis teh basa minggu kamari menta putus ti Jang Iki ku gara – garana geus teu bogoh deui ceunah.

Jang Iki narima cinta Neng Nendah ku hiji pasaratan, nyaéta lamun éngke gés kawin jéng manehna, Neng nendah kaasup kulawargana tong kabeuratan mun manehna rek nyandung deui ka awéwé nu lian. Nya kapaksa dalah dikumaha bapana Neng Nendah, kaasup Neng nendah teh nyatujuan eta pasaratan.

Hiji poé Neng Nendah balik ti pasar gés meuli jang bahan babawaén ke kawin, dijalan Neng Nendah dicegat ku parampok, tuluy kusabab ninggali rupa Neng Nendah nu Endah gélisna, jéng kabeneran harita Neng Nendah indit nyorangan make baju nu seksi nu eces ningalikén cetakan imbitna nu bahenol nerkom nya ku parampok eta teh tuluy dirajéngan, dipaksa ngalayanan nafsu edan eta tilu parampok. Tapi kusabab Neng Nendah teu sudi, tuluy manehna teh tuluy ngalawan nepika sanggésna dibacok nepi ka ilang nyawana.

Jang Iki tuluy jadi nyorangan...hatena teu wéléh ngarasa salah kacida ka Neng Nendah, kusabab harita teh manehna nolak nganteur Neng Nendah ka pasar, sédéngkeun Neng Eulis ayeuna geus indit ka luar nagari dibawa ku salakina. Paripolah Jang Iki nu plinplan tur “asa aing” téh tungtungna karandapan goreng mamala kér manehna sorangan. Manehna nyumpahan diri sorangan, sapanjang hirup dumeulah di alam dunya ieu moal deui – deui bobogohan atawa kawin jéng batur, ayeuna manehna katelah disebut bujang tunggara.

Mugia carita karangan simkuring diluhur tiasa dicandak tur dipetik hikmahna..."naon we lah teu langkung nu maca hehe *pisss ah".
Hapuntén boh bilih aya nu kaabotan, teu aya maksad sanes, iwal ti sakur hoyong nyerat dina tengah wéngi ieu, sabab hese peureum nyeri gugusi hiks :(

Baktos simkuring,
Lilis Mayasari/ LieZMaya.
Bekasi 24/10/2009.

Saha LieZMaya teh?

2007-11-07T09:49:00.002+07:00

LieZMaya, Hiji wanoja nu lahir di pakampungan Cimuncang Jelekong (Kampung pakumpulan seniman sunda, sapertos dalang, pelukis, ukiran wayang, jsb.) ping 10 Agustus 1988 dina dinten Rebo tengah wengi antawis tabuh 12 weungi ngagubrag kaalam dunya tina panto rahim ibu nu mulya nyaeta Nyai Eti binti Aman sareng pun bapa, Ayi Abdulrachman Herliansyah. Ti umur opat Taun ngalih ka lembur leutik nu ngarana kamung Cidodol, desa Rancakole nu ngabogaan kacamatn Arjasari. Ti mimiti pindah nepi ka dumelar ayeuna Alhamdulillah ngaraos betah sakulawarga teh. Putri nu kahiji tina opat sarangkai adi lanceuk.

Jenengan asli simkuring Lilis Mayasari nu sok di geroan ngaran singkatna "Neng atanapi Lis", rayi Robi - Robiansyah, N. Rifa Nurfadillah, M. Reizhan Ramadhan.
Ngabogaan pasifatan nu nyaah kadulur, resep ikhtiar dibarengan ku akherat InsyaAllah, tur mikacinta Budaya sunda. Najan simkuring teu lahir ti indung bapa dina lingkung kasenian, tapi aya kahayang kereteg hate saeutiknamah ngamumule budaya sunda. Najan ngan sabatas curat coret ngacapruk diajar dina Blog ieu, InsyaAllah hoyong nerasken kapayunna.

Ayeuna simkuring nuju ikhtiar nyiar elmu jeung dunya di kota Bekasi barat, dina widang parusahaan IT hosting nu ALhamdulillah tos dikeureuyeuh ti taun 2006.
Saprak kaluar namatkeun sakola di:
- SDN Otto Iskandar Dinata - Bahuan Arjasari.
- SLTPN/ SMPN 3 Ciparay - Babakan Ciparay.
- SMK Mutiara sandi Baleendah dina widang jurusan Manajemen Bisnis.
InsyaAlloh hoyong nerakeun ka paguruan tinggi pami aya yiswa, kasempetan tur ridlo ti Gusti Alloh SWT. Amin.

Mung Sakitu heula ah,
Cag...Baktos simkuring.

Lilis Mayasari A.K.A LieZMaya.

Anjeun - Puisi titipan kang Haidar Pasundan

2009-10-21T15:56:00.004+07:00

Anjeun

Ayeuna kuring ngarasa nyorangan.
Teu ngarti naon anu geus kajadian
Teu kabayang anjeun rek indit
Ninggalkeun kuring sorangan

Ayeuna kuring sadar
Cinta teu kudu ngapimilik
Teu nyangka, seuri, ceurik jeung hereuy anjeun
Harita keur anu pamungkas.

Kenangan rek disimpen dina hate
Ngan teu bisa kapimilik
Anjeun geus milih jalan anu tangtu
Jalan anu moal pernah balik deui

Dina hate anjeun kuring cicing,
Dina hate kuring anjeun cicing.

Ayeuna kuring kudu ngalepaskauen anjeun,
Mang rebu rebu hampura jeung nuhun,
Pengorbanan anjeun, moal dileuleungit ku kuring
Anjeun janten suhada, Nuhun Ya Allah

By Haidar pasundan...
bari sedih iyeu teh ngarangna, sedih anu teu apal iraha wanci panungtungna....

Image by: DeviantArt.

Lembur Kuring Kacamatan Arjasari/ Ardjasari

2009-10-20T10:13:00.008+07:00

Arjasari nyaéta lembur kuring nu nyingkur ti kota, tempat dimana kuring digedekeun, nyiar elmu ti leuleutik nepi ka ayeuna manjang hirup sakulawarga.

Arjasari/ Ardjasari nyaéta ngaran salah sahiji kacamatan nu aya di Kabupatén Bandung, Propinsi Jawa Barat, Indonésia. Kaasup wilayah lebaheun Soreang.
Desa nu kaasup kana wilayah kacamatan Arjasari nyaeta: Ancolmekar • Arjasari • Baros • Batukarut • Lebakwangi • Mangunjaya • Mekarjaya • Patrolsari • Pinggirsari • Rancakolé • Wargaluyu. Ekonomi masyarakatna masih keneh menengah kahandap, profesi lolobana nyaeta patani jéng pangdagangan hordeng/ gordin nu diicalan ka luar kota/ luar pulau jawa.

Sawah tur gunung masih keneh harejo, diapit ku gunung Geulis, sering dijanténkén trek jalur olah ragi sasapedahan, sabab ku mudun jéng nanjakna lumayan nantang. Daerah lahan pertanian lebah pinggir sari sering dijanténkén tempat praktek pikén praktek calon insinyur pertanian.
Salian ti pertanian oge Arjasari aya sababaraha peternakan penghasil hayam jéng susu sapi.
Dumasar kana ingfo ti Google.Com Arjasari teh koordinat pernahna teh di:

UTM : YT91
Geographical coordinates in decimal degrees (WGS84)
Latitude : -7.056
Longitude : 107.646
Geographical coordinates in degrees minutes seconds (WGS84)
Latitude : -7 03' 20''
Longitude : 107 38' 47''.
Link Google tiasa dipilari di Google Map arjasari.

InsyaAllah kapayuna bade di teraskén ngenaan ingfo pilemburan simkuring nu leuwih lega deui.

Baktos: Lilis Mayasari/ LieZMaya.

Piknik ka Cibolang - Pangalengan

2009-10-15T23:40:00.007+07:00

Bismillah,

Kumaha daramang lur? Duh hapunteun yeuh ti Saparantos boboran kamari tacan kantos simkuring ngapdet (pami ngapdet bahasa sundana naonnya? Mulasara kitu nya? Heheh), aya sababaraha hiji pembaca nu satia ieu blog parantos haharewosan ka simkuring kangge ngapdet deui saurna. Ku Séérna padamelan ahir ahir ieu nu antukna ngamatakén rada sésah simkuring tiasa nyalingkérkeun waktos kangge kutrat kotret ngacapruk didié...halah kalah baceo géningnya.

Ieu mah mung tamba we nyirikén ayana tanda - tanda kahirupan dina surélék blog ieu teh, sangkan tong pareum teuing, simkuring bade nyaritakeun sakedik pangalaman hiji pangpiknikan nu kungsi di jugjug basa kamari liburan boboran tea di Bandung.

Di Bandung beh (kidul kitu?) aya hiji daerah namina Pangalengan tea, pasti sadayana ge parantos arapal ku kamasyuran eta daerah nu komoditena nyaeta penghasil énteh. Subhanalloh sapapanjang jalan (bari butut rarinjul aspalna raréksak) ku asal nyeblak hate ninggal amparan tangkal énteh nu harejo. Lir ibarat mun nuju ninggal laut hate teh asa waraas ku kaAgungan nu Maha kawasa.

Harita kaping 24 September 2009 (lebaran 5 H+) Simkuring start naek motor dibonceng ku pun rayi ti lembur Rancakole/ Arjasari tea tabuh dalapanan enjing enjing, sasaréngan jéng rengrengan batur salembur nyandak jalan Cibeureum.

Trek Rancakole – Maruyung – Cibeureum – pangalengan, niatnamah ceunah hoyong motong jalan, beu aripekteh kalah 2x lipat tebihna asana teh!!! duka pedah jalanna nu raruksak kitu, atanapi simkuring nu teu biasa jalan tébih ngangge kandaraan motor (nya puguh we da sadidinté padamélan uplek payunén monitor hehe).

Sakitaran tabuh 10an dugi ka Bendungan Cisanti, nu hawar hawar cénah mah eta situ teh huluna walungan Citarum tea, sabari istirahat jéng daripada panasaran nya mampir héla kadinya teh. Karcis pasrkir motor saréng dua jalmi mayar sapuluh rebu. Turun ti parkiran, ngonci2 ganda motor, nitipkén helm (mayar deui dua rebu!) teras mapah deui ka palih handap, ka lebah eta situ sakitaran 50 meteran. Hmmm sepi...tiisén, caina eta situ teu patos sae katinggalna mah, mung ukuranana lumayan ageung 2 haktar kitu pami teu leupatmah...hmm paburantak sampah dimana mana (tos teu aneh deui panginénnya tempat wisata di Indonsia mah karitu sabahagian lobana). Hhhh pokoknamah teu srék cicing lami lami didinya teh. Saparantos cicing heula barang satengah jam niis ngalémpéngkén tuur langsung we lanjut ka tempat tujuan nyeta Pangalengan.

....Lets Gooooo dak! Pokna pun rayi teh nyumangétan.

Dijalan ampleu ampleuan sajam satengah, bari jalan kaayaan beuki parna, batu batu teh baradag, duh matak karunya kana “kébo” nu ditumpakan, palaur bitu ban, mangkaning teu kaambé aya bengkel...sajajalan ngadua mugia si “kebo” teh cing kuatén hehe. Tirisssssna Pangalengan tos mimiti karaos Hmmm Alhamdulillah dugi oge ka lebah Gunung Malabar nu endah (Disebat Malabar cénah da kusabab eta gunung teh badag pisan lebarna), cénah didinya tea teh tos tereh dugi kanu namina laboratorium Bosscha tea, tapi kami teu kantos kadarinya héla da géning langit tos katinggal rada ceudeum. Nya atuh mung tiasa yu dadah babay wungkul we. Satengah jam Alhamdulillah dugi ka wahana wisata pemandian air panas/ hot water spring Cibolang tea.

Hmm hmm leubeut kadinya ampuuun pinuhna kacida, parkiran laris manis, mayar parkir harita 20 rebu totalna (Bari saur gossip mah pami dinten biasa mah mung mayar dua rebu perak, da bakat ku tiisén cénah), kasempetan tah para pengelola teh nambihan rizki lebaran panginteunna hihi. Beu! gogodég ninggal jalmi nu pinuh ciga sirém kukucuprakan dina kolam. Ti mimiti Budak alit dugi ka sepuh ngarojay didinya. Alhamdulillah simkuring teu ngiringan, da teu nyandak acuk gentosna. heheh Nya atuh kapaksa w ngan tiasa nyobian hiji kolam nu sepi taya nu ngojay (nya puguh we da panas pisan suhuna), ngan sakur tiasa ngantelkén dampal sampean barang sadetik dua detik...cigana mun nyandak éndog bakal asak barang lima menit wae mah langsung tiasa disantap. Saurna eta kolam teh tiasa ngadamangkeun panyawat kulit tur rematik...didinya ge aya fasilitas ngagogo sareng Flying Fox, nambihan mayar 10rebu.

Saparantos karaos rada rileks teras we panasaran, asa nu ngawartosan saurna dilebah luhur gunung teh aya nu namina kawah burung, nya atuh ngajug jug w ka eta tempat, namina ge ngadaki gunung...nanjakna kacida gustiiiii, ngos ngosan teu kiat, sababaraha kali ngarandég istirahat dijalan teh. Alhamdulillah satengah jam dugi ka eta kawah burung, bau balerang ka ambé pisan, ngamatakén liér kana mastaka. Ya Alloh handéél keuseul nu aya dina hate teh, nu ka tinggal payunén soca teh mung sakur babatuan, tenéh koneng jeung balerang. Teu lebih ti lima menit langsung balik arah turun gunung deui hiks...kaduhung antukna mah.

Saparantos dugi ka handap patuangan karaos kukurubukan, tur liér, sesa tadi ngambé balerang tea. Nya atuh lumpat w ka warung nu aya disakitar eta wahana. Teu mendakan nu ngicalan sangu, kapaksa w mung sakur tiasa jajan bakso wungkul. Tilu Jam saparantos warég ninggalan sabudérén Cibolang teh langsung mulih deui ka lembur, da ninggal langit nu ceudeum palaur hujan.

Beu aripekteh énya we uih teh kapegat ku hujan badag ngagébret, namung Alhamdulillahna teh jalan nu ditempuh teh sae, da sanes nyandak jalan Cibeureum deui, tapi nyandak jalan raya Pangalengan Banjaran. Lima kali ééréna ngiuhan di saung saréng payunén bumi batur ngantosan raat hujan, opat jam di jalan Alhamdulillah salamét dugi ka lembur. Kabulusan, tiris ku pangalengan ditambih tiisna hujan nu ngaririncik sapanjang jalan.

Susu nu dihanétkén ku pun ibu, permen susu ti pangalengan nu khas jantén oleh oleh lumayan ngobatan manah :)

Hapunteu Boh bilih aya kalepatan kécap diluhur.
Poto/ gambar diluhur dicandak ti dokumentasi Pribadi, tur nambut ti Web Cibolang.

Cag ah, baktos simkuring

Lilis Mayasari/ LieZMaya.

Pesen Mudik kang Dik Dik

2009-09-29T09:20:00.006+07:00

Dina inbox email simkuring (Alhamdulillah nembe kaparios kamari ieuh basa nembe mulis mudik ti lembur Bandung) salah sawiosna nyendong reply nu dikintun ku salah sahiji dulur baraya sunda pembaca satia ieu blog ngacapruk, nyaeta kang Dik Dik Rahmat R., anjena ngawales/ reply email nu dikintun kusimkuring samemeh lebaran, nyaeta samodel kartu ucapan wiljeng boboran nu sacara otomatis di kirim ngegunaken feedburner tea *sok atuh subrice lur!.
eusina kusimkuring copas dihandap ieu, teu dikirangan, teu dilangkungan hehe. Mung hapunten kangge ka saderek kang Dik dik pribados simkuring tacan nyungken widi mosting ieu eusi email...saupamina kaabotan mangga wartosan bae simkuring, insyaAllah bade langsung di delete bae :) Hatur nuhun kangge kintunan emailna.
Image by: DeviantArt.

saupamina wae teu tiasa pasanggrok dina dintenan boboran, rupina wae ulah dugi ka mohokeun silaturahmi.
nu puguh mah, jiga na kabiasaan balik (mudik) dina poe an lebaran ngarupakeun hiji simbol kahirupan. sakumaha urang rek jadi naon, atawa ngumbara ka ujung bumi tetep tumetep dina waktu cunduk mangsa urang teh bakal balik ka asalna.

Ngan hanjakalna, loba nu teu ngarti alias polos kana hartina mudik...... !!
ieu mah katingali ku diri sorangan lain ceuk batur carita teh.

Masih dua poe deui ka lebaran, kuring di pagawean acan pere (da babaturan anu jauh mah ngahaja ku kuring sina pere ti heula).

Tah cumarita wae kuring panggih jeung sarombongan (kaluarga) anu bakal mudik tea meureun ti ditu na mah.
Kuring asa era sorangan, ningali eta rombongan nu mudik (pituin sunda) meni bareda boh basa jeung pokona mah beda lah....!!
dina panampilan anu awewe make riben si manohara tea geuning, leuengeun nu sabeulahna pinuh ku geulang bare ranggem ngadahar buah apel (padahal puasa keneh).
Kuring lain ambek ku babasaan jeung sajabana, keun lah eta mah suka bungah maranehna. Ngan kuring ngarasa kadorong ngageuingkeun dina etika barang dahar, sugan kakarak manggih apel beureum atawa memang ngarasa gaul (tidituna mah modern lah teu puasa). Atah adol diantep teh malah ditambahan ku nu lalaki, geus mah make calana nu kurang bahan ditambah geuning model anu ngahaja nempokaeun calana jero (leuheung mun wedel mah) da eta mah si haram jadol teh make legeg ngaroko (tengah poe).
Kuring teu eleh guprak, ningali tontonan kitu sanajan rombongan kuring teu mundur ari kana ngabebebener kalakuan mah.
Kuring oge ngaroko, geus lah pokokona mah kuring wakca nyarita ka eta rombongan mudik : " ari aranjeun teh jiga na ngaruksak diri aranjeun sorangan, teu ngahrgaan kana usaha anjeun anu kacida lila jeung ayeuna rek mariang baralik tapi hanjakal aranjeun teu pisan boga atikan laku anu bener .... ! Eta mah duka kumaha maranehna langsung caricing, era duka kumaha. Ditambah ceuk kuring teh, tah kuring ge kamamana mamawa rokok, tapi ari keur puasa jeung dina kandaraan mah tara diroko, tuh dina kantong kuring aya bubuahan leuwih seger tibatan anu ku maraneh didalahar......... !! cik... cik ..... ulah
sok adigung jeung.

Duka nepi ka ayeuna kuring teh sok mikir, naha ari kalakuan teh sok rada araneh nya
mun baralik ti pangumbaraan ...? ari ras ka kuring, kuring oge ngumbara tapi asa arera paradah rek make teh, anu cek hate kuring oge bisa. Tapi tetep teu merean.
Geura tingali tuh nu ngarambay dina ceuli bari laleumpang atawa naek motor, sirah gigideugan da nyaruakeun jeung sora lagu/musik. tungtung na sarangeunahna make jalan teu ningali aturan.
Pokona mudik lah, bari jeung teu ngarti oge !
Mudik tujuh mulud
Beres mudik,
teu arudud
nu aya mah jaramedud

wakca ieu mah Tjeu Lies,.......... cing bejaan tah dulur-dulur ki sunda anu make basa " elu, gue, nyokap, bokap " teh ulah sok kamalinaan jeung era wae ku logat nu henteu merenah he...... he........ sinuhun .......

Wilujeng Boboran syawal 1430 H

2009-09-16T15:29:00.002+07:00

Deudeuh Euis

2009-08-23T13:45:00.002+07:00

Sababaraha kulah kadeudeuh
hate kapentang duriat nu jero
antara bab baban nyaah kuring nangtung mihareup

Lain estuning sagara wae nu ngeplak
nu panas ngalingkeub kawah timuru
pakasaban ngarangrang cimata tiis kanyeri
heab ku poe citresna anjeun nu teu katarima

Deudeuh euis...
Cinta teh lain ngan hiji
Sono teh seni na carita dua
harti hirup lain ngan sakur manehna
aya keneh nu ngalalana neang surti salira
engkang nu hiji...

Shiam 1430 Hijriah

2009-08-22T09:54:00.001+07:00

Esmosi

2009-08-20T14:06:00.007+07:00

"Duh gawat aing mah yeuh mun unggal poe kieu wae kaayaan teh"
"naha naon kitu?"
"Heu unggal poe teh loba wae pikacapekeun huntu teh aingmah, kudu afdol we ambeuk ambeukan teh euy...aya aya wae lah nu ngagoda teh aing mah, mangkaning pan sakeudeung deui rek nincak bulan puasa pan, palaur batal we aing mah lah!....Esmosi yeuh Esmosi!!!"
"Latihan meureun ti Gusti Alloh ngambeh maneh leuwih bisa nyabaran hate"
"heu'euh meureunan, tapi da atuh lila lila mah da kuring teu kuat...asa hayang ngadahar jelema, ngeunah meureunan!"
"aduh siah, kabur ah aingmah sieun" ber ngabeucir bari ngagigiwing sendal capit nu sisirangan.

Punteun ah nu diluhur mah mung sakadar carita barudak lembur kamari ieuh basa mudik Agustusan ti Bandung heuheu, Simkuring nyungkeun neda dihapunteun tina samudaya kalepatan nu parantos dibalukarkeun ku simkuring pribados, mugia dina mayunan sasih shaum, sasih romadon urang silih bebaskeun sangkan bersih tiasa ngajalankeun sagala rupi ibadah nu dipikaridho ku Gusti Alloh SWT. Amin.
Wilujeung mayunan sasih Romadon 2009/ 1430 Hijriah :)

21 Taun

2009-08-11T09:44:00.001+07:00

Geus teu karasa ngaliwatan waktu nu sakitu lilana mun diitung sapoe sapoena, tapi da bakat ning ku betah dialam dunya ieu waktu nu dua puluh hiji taun ieu téh asa teu karasa lilana.
21 taun katukang téh kuring ngagubrag ka alam dunya ieu, teu make baju alias ti bubulucun, ngan dibeulit ku tali ari ari jeung ku kembaran kuring nyeta si Bali tea. Nepi ka ayeuna indung kuring masih keneh neundeun eta tanda lahir dina lomari...teuing ku naon jeung teuing jang naon *tong nanya!*, ngan nu pastimah meureun anjeuna téh boga kenangan supagi teu kapopohokeun perjoangan nu jadi indung pikeun ngalahirkeun budakna “nyeta simkuring” ka alam dunya ieu.
Ceunah mah ceuk carita kolot teh...

Kuring téh lahir ka alam dunya teu pati ngahsesekeun/ nganyeurikeun indung, kuring lahir dina kaayaan awak nu leutik...heu ceuk istilah dokteh mah kuring téh prematur tea dina poe ka sapuluh bulan Agustus tengah peuting jam dua belasan, teu karasa ceunah kaluar tina jeuro rahim téh...gedena ge ngan sakur sakeukeuleun botol coca cola, nepi ka ti mimiti indung bapa aki nini jeung dulur dulur téh nyurucudkeun cimata (asa percaya teu percaya kuring ge ngadengena, ngan nya Kawasa ning Gusti Alloh SWT – kun fayakun), ditambah indung téh ngabogaan sajarah pernah kaleungitan dua anakna nu kembar *nyeta lanceuk kuring nu awewe* barang borojol ngagubrag ka alam dunya téh langsung dipundut ku Gusti Allah, tah kumatakna maranehna téh ngahamdallahan kalahiran kuring nu salameut. Geus ngarandeug rada gede nyeta umur sataun dua taun kuring kakarek bisa leumpang, jalma jalma nu mikanyaah kuring disagigireun téh atohna kacida pas ninggali kuring hanjat ngabeuleunyeung lumpat moro jambu beureum nu murag ti buruan hareup..teu disangka sangka pisan kuring téh rek pihirupeun atuh da ceunah, kumatakna jadi tongtonan kabungahan, langsung dipirig ku cocooan jeung kado lianna nu teu sakabeh budak saeuntragan kuring waktu eta bisa meunang eta kabungah.

Ngarandeug geus rada gede nepi ka geus sakola SD kelas geuneup hirup kuring téh teu gampang, ririwit wae geuring...pang pangnamah dina kasehatan tulang kuring, mun labuh sautik téh kudu w langsung aya nu salah jeung tulang téh kudu dibenerkeun ka dokter atawa spesialis ahli tulang. Ngan Alhamdulillah Gustimah da Maha kawasa, ti saprak nincak bangku SMP nepi ka kiwari kasehatan kuring bisa disebut normal jeung nu lian, kuring sehat jag jag beuleujag nepi ka ayeuna geus nepi titincakan umur téh dua puluh hiji taun, kumatakna lamun paamprok jeung kolot baheula (dulur) nu geus lila teu panggih sok langsung digabrug, pokna teh sok asa teu percaya yen ieu teh kuring tea nu baheula leutik ciga kiciwis, ha'at ninggalina, nyukuran Alhamdulillah ku kabungah sabari teu eureun merinan pangjurung du'a.
Alhamdulillah pangdu’a ti kolot jeung sakabeh jalma nu nyaaheun ka kuring téh geuning di paprinan ku Gusti téh, susuagan mugia kuring teu nguciwakeun nu jadi panghareupan maranehna.

Umur 21, loba carita amis pait raheut asem asin nu geus kaasaan kukuring, najan can loba tapi Alhamdulillah geus kaceuceup nu kangaranan pamikiran leuwih dewasa/ kolot dina diri kuring. Cing panceug hirup sangkan jadi hurip, betah dialam dunya lain ngan sakur beutah ku kadunyaan wungkul, lamun dibere harepan umur panjang cing jadi mangfaat keur jalma jalma nu papada ngabutuhkeun, silih asah silih asih silih asuh jeung dulur, rizky nu halal, kabungahan lahir jeung batin nu dipihareup. Satungtung hirup abdi ulah nepi ka jadi budak nu doraka ka kolot, mugia cing ditebihkeun Gusti eta lalampahan nu dipika ngewa ku Anjeun téh.

Hatur nuhun kangge ka sadayana nu ngiring ngadu'akeun simkuring, mugia cing diwales ku Alloh SWT. - Jika lupa bukan berarti melupakan, sudah cukup bahagia dengan semua yang telah kau berikan padaku tuan.

Eulis...

2009-08-03T00:57:00.004+07:00

Eulis enteupna hate engkang téh lain sakur sakahayang hate jang sakeudeungeun hirup, lain ngan sakur rasa nu datangna jorojoy neuteup kageulisan imut salira...lain pisan Eulis, nimbang nimbang rasa engkang samemeh rek nanya hate salira téh, geus salila urang paamprok di leuwi harepan di Cikahini...lembur urang nu basajan, hideung panon salira ngagenclang asa nyecep ku hiji kiceupan nu moal kapohokeun ku engkang nepi ka pedarna waktu.

Geus dua taun urang babareungan, geus rakeut pageuh hate engkang mikanyaah salira, lir ibaratna katumbiri nu pinuh ku warna kabungahan...ayeuna mun salira menta papisah hirup engkang téh Eulis bakal paeh, moal jauh ti bodas jeung hideung wungkul.

Euh Nya widadari engkang nu ngarajaan sakumna hate, Keun we Eulis rizki mah moal leungit kamana, nu leungit urang teang deui, nu can kaala urang udag babareungan, nu moal kabeunangan ku urang da lain jodona meureun Eulis, cing sabar...kitu deui jeung engkang, moal weleh nyabaran hate keur neundeun sumur kadeudeuh keur salira..ngan ukur hiji salira Eulis.

Tong tega Eulis ninggalkeun engkang, tali asih nu kungsi pasini pakait ati, ngajangji paheut basa urang pariron lelepen.
Cinta engkang masih keneh ngaleuwihan gedena sagara kulon nepi ka saumur dumeulah,...
Moal beak najan Eulis ngawurkeun kanyaah ieu.

Titipan ti salah sawios tamu nu satia ngalongok blog ieu "saurna teh" :D

Hiburan online radio sunda “Dora Dori”

2009-07-30T13:53:00.004+07:00

Geus sababaraha bulan ieu aya nu anteung teu boseun bosen maturan simkuring didameul online dina internet, sajabaning ti maen pesbuk sareung tuiter heheh. Ti mimiti wanci jam satu beurang keur panas mentrang mentring nepi ka jam tilu sore nyetel winamp ngadengukeun streaming radio nu ngagaduhan jinggle khasna “Geboy mania” Rama FM Bandung anteung ngadangukeun acara Gentra Parahyangan Rama nu di candakeun ku “Tenteu Dorra sareung kang Dorry” nu lalucu heuheu (osok oge direncangan ku tokoh tokoh khas kang Dorry nu sanesna), eh aya oge acara kilat Cangegang nyaeta singkatan ti "Carita Ngeunah dan segar" *mun teu leupat mah.

Sok mangga geura bilih bade panasaran sono ka lembur atanapi baroseun ngadangukeun lagu lagu jaman ayeuna nu "teu paruguh", sakedikna tiasa ngabeubeurah manah ngadangukeun siaran radio sunda oge teu kalangkung diputeur oge tembang tembang sunda, tiasa ngarequest oge da atanapi telepon.

Alamat streamingna nyaeta: http://rama-fm.simaya.net.id:8800/ tanapi langsung bae tepangan website-na ramafm.com

Tangkal nu sok api api geuring

2009-07-23T14:27:00.004+07:00

Tiriling...tiriliiing...tiriliiing...
Hp disada, tandana sms aya nu asup isuk isuk ieu. Aya seueur operatos kartu di Indonesia nu kasebut murah ceunah, tapi da dsar hargamah moal meunang ngabobodo...bong abong murah loba pisan sms promosi nu arabus unggal poe teh, komo deui aya oge nu nepi ka make telepon...nu ngomongna nyaeta operator manusa sorengan jeung mesin/ komputer. Sakapeung reuseup macana lamun memang eta ingfo nu ditepikeun dina sms teh memang guna samodel mun aya diskon hehe, tapi asa seubeul lamun ingfo nu ditepikeun teh yen ingfo nu teu paruguh, halah horemlah pokoknamah macana teh.
Isuk ieu meunang "ingfo Asyik" ceunah, nu eusina teh lumayan aya pengetahuanana...eusina teh kieu:

Di hutan hujan Ekuador, Amerika Selatan, terdpt tumbuhan yg bs berpura-pura sakit utk mengelabui dan menghindari serangan serangga yg suka memakan daun sehat! Daun akan berubah warna & muncul bintik atau garis2 jika tumbuhan itu sdg beraksi. Ternyata bukan cm manusia aja ya yg bisa pura2 sakit hehehe...

Subhanallah, Tah matak memang bener pisan yen Alloh mah Maha Agung, Maha kreatif nu nyiptakeun sagala mahluk nu moal bisa ditiron sampurna ku manusa ciptaan manteuna.
Hmm pas ditilik tilik panasaran ingfona nu aya di website geuning aya ingfo nu akurat ditulis ku BBC ngeunaan tangkal nu sok api api geuring ieu teh, mangga pilari didieu yeuh bilih panasaran oge hoyong maca beritana.

Kapaksa Golput...

2009-07-07T20:37:00.003+07:00

Pilih nomer hiji...
Pilih nomer dua....
Pilih Nomer tilu.......
Hirup “si eta”, hirup “si itu”, hirup “si manehna”...*hirup “Jungjunan alias LieZMaya alias Neneng alias Nini alias ngaran lainna nu teu paruguh” haha :P

Masing masing individu saurang - saurangna bobogaan panguat hate pikeun milih pamingpin dina taun dua rebu salapan ieu (alias isukan, tanggal 8 Juli 2009) pikeun nangtukeun nasib bangsa Indonesia urang lima taun kahareup, tah eta ge kaasup simkuring pribadi, hate leutik aya kayakinan pikeun milih salah sahiji calon pasangan presiden kahareup. Tapi ngan hanjakal siganamah simkuring teh teu tiasa ngagunakeun hak pilih geuning lur da kusabab kartu pemilih simkuring masih keneh kacatet di lembur Bandung, sedengkeun simkuring ayeuna keur hirup nyicingan bumi Bekasi, heu ceunahmah ceuk beja bisa make KTP ngan kudu dibarengan jeung kartu kulawarga (beu anggeur anggeur keneh atuh da kartu kulawarga simkuringmah teu dibabawa kadieu, aya dina lomari arsip di imah lembur heuheu) jabaning ketang dih da kudu milih di tempat domisili urang...beu keneh kehked atuhnya, berarti etamah ngan sakur jang masyarakat nu teu kabagean/ kacatetkeun ngabogaan kartu pemilih tea meureunan... ah sarua jeung bohong jang simkuring mah atuh, jadi kapaksa we kudu golput da rek ngahaja ka Bandung mah balik heula imposibel pisan hiks.

Tapi kuring ngadu’akeun saha saha bae nu kapilih jadi pemingpin eungke mudah mudahan cing tuhu kana amanah rakyat, sangkan bisa mawa urang kana kahirupan nu leuwih hade batan waktu katukang.

Janteun amanat penting dina postingan ieu teh, sok pikeun anjeun anjeun nu geus ngabogaan hak pilih tong di sia – siakeun, da lamun hak sora urang teu dipake mah ke kalah jadi untung pikeun pamingpin nu ngabogaan niatan goreng...ceuk basa politiknamah “penggelembungan suara” ceunah pan, komo deuih lamun euweuh halangan nu karandapan ciga simkuringmah heheh....Beu hampura, lain teu hayang!

Wilujeung Mayunan sasih shiam

2007-09-08T12:05:00.001+07:00

Sakumna umat Islam kiwari ngagorowokeun ‘Marhaban Yaa Ramadan, Marhaban Yaa Ramadan”, Wilujeung sumping Ramadan, Salamet datang Ramadan. Di masjid-masjid, musholla, koran-koran, stasiun télévisi sarta radio sarta sagala rupa mailing list, babasan salamet datang Ramadan tampil kalawan sagala rupa ekpresi anu variatif.

Saban média geus siap kalawan kalawan sederet agéndana séwang-séwangan. Aya rasa atoh, ke-khusyu’-an, harepan, sumanget sarta nuansa spiritualitas séjénna anu sarat harti pikeun diekpresikan. Éta pisan Ramadan, bulan anu taun ka tukang urang ucul ditinggalkeun kalawan nyurucudkeun cai panon, kiwari datang deui.

Sajumlah pamentaan hampura sarta hikmah-hikmah anu kaeusi dina ibadah puasa ogé rame dikaji sarta kembangkan. Aya peunteun sosial, katengtreman, kamanusaan, sumanget gotong royong, solidaritas, kababarengan, ngababaturan sarta sumanget prularisme. Aya ogé mangpaat lahiriah kawas: kaséhatan (utamana perncernaan sarta metabolisme), kanaékan intelektual, kemesraan sarta keharmonisan kulawarga, kaasih nyaah, pengelolaan hawa napsu sarta penyempurnaan peunteun kepribadian séjénna. Aya deui aspék spiritualitas: puasa pikeun kanaékan kecerdasan spiritual, kataqwaan sarta penjernihan haté nurani dina berdialog kalawan al-khaliq. Kabéhanana nyaéta peunteun-peunteun positif anu kaeusi dina puasa anu selayaknya henteu ngan urang pahami minangka wacana anu nyumponan intelektualitas urang, tapi nungtut implementasi sarta penghayatan dina saban aspék kahirupan urang.

Anu ogé penting dina ngabagéakeun bulan Ramadan tinangtu nyaéta kumaha urang ngararancang léngkah strategis dina ngeusianana ambéh sanggup mroduksi peunteun-peunteun positif sarta hikmah anu dikanung. Jadi, lain ngan melulu mikir menu pikeun berbuka puasa sarta saur waé. Tapi, urang teh perlu nyusun menu rohani sarta ibadah urang. Lamun direnungkan, menu buka sarta sahur komo mindeng leuwih istemawa (baca: mentéréng) dibandingkeun jeung kadaharan kasapoé jeput urang. Tinangtu, urang kudu nyusun menu ibadah di bulan suci ieu jeung kualitas anu leuwih alus sarta batan poé-poé lain. Jeung kitu urang bener-bener bisa ngarayakeun samarak bulan kameunang ieu kalawan leuwih mumpuni.

Ramadan nyaéta bulan nyumangetan. Bulan anu ngeusian deui batre jiwa sakabeh muslim. Ramadan minangka ‘Shahrul Ibadah’ kudu urang maknai jeung sumanget pengamalan ibadah anu sampurna. Ramadan minangka ‘Shahrul Fath’ (bulan kameunang) kudu urang hartian kalawan ku meunang kahadean tina sagalakagorengan. Ramadan minangka “Shahrul Huda” (bulan petunjuk) kudu urang implementasikan jeung sumanget ngajak ka jalan anu bener, ka ajaran Al-qur’an sarta ajaran Nabi Muhammad SAW. Ramadan minangka “Shahrus-salam” kudu urang artikeun kalawan pikeun ngusahakeun katengtreman nu adem ayem. Ramadan minangka ‘Shahrul-jihad” (bulan perjoangan) kudu urang realisasiken kalawan perjoangan ngalawan kadoliman sarta panindesan sagala hal nu teu adil di bumi ieu. Ramadan minangka “Shahrul Maghfirah” kudu urang hiasan ku ménta sarta mere hampura.

Kalawan nyiapkeun sarta memrogram aktifitas urang salila bulan Ramadan ieu, insya Alloh baris ngahasilkeun kabagjaan. Kabagjaan baris karasaeun istimiwa dina wanci ngaliwatan perjoangan sarta usaha satekah polah. Beuki beurat sarta sarius usaha urang ngahontal kabahagiaan, mangka beuki nikmat kabagjaan éta urang rasakeun. Éta pisan anu dijelaskeun dina hiji hadist Nabi yén jelema anu puasa baris meunangkeun dua kabagjaan.

Kahiji nyaéta kabagjaan sabot manéhna “Ifthar” (bubuka). Ieu hartina kabagjaan anu duniawi, anu beunangna sabot kapinuhanana kahayang sarta kaperluan jasmani anu saméméhna geusdi cangcang, atawa kabahagiaan rohani alatan ngubaran kahanaangan sipritualitas kalawan simbeuhan simbeuhan ritual sarta amal sholehna.

Kadua, nyaéta kabagjaan sabot papanggih kalawan Pangéranana. Ieu pisan kebahagian ukhrawi anu beunangna dina waktu pasamoanana anu hakiki kalawan al-khaliq. Kabagjaan anu mangrupa penclut ti saban kabagjaan anu aya.

Ahirna, hikmah-hikmah puasa sarta keutamaan-keutaman Ramadan di luhur, bisa urang jadikan média pikeun muhasabah sarta meunteun kualitas puasa urang. Hikmah-hikmah puasa sarta Ramadan anu sakitu réa sarta mutidimensional, mengartikan yén ibadah puasa ogé multidimensional. Kitu réa aspék-aspék ibadah puasa anu kudu diamalkan ambéh puasa urang bener-bener ngabogaan kualitas sarta sanggup ngahasilkeun peunteun-peunteun positif anu dikanung dijerona. Saurang ajengan sufi ngomong “Puasa anu panghampangna nyaéta ninggalkeun dahar sarta inum”. Ieu hartosna di ditu réa kénéh puasa-puasa anu henteu saukur teu menang dahar sarta nginum salila dina saban poe, ngalainkeun ‘puasa’ séjén anu boga pasipata batiniah.

Muga kalawan nyiapkeun diri urang sacara maksimal/ bener – bener sarta merencanakan aktifitas jeung ibadah-ibadah kalawan ihlas, sarta boga niat “liwajhillah wa limardlatillah”, alatan Alloh sarta alatan néangan ridha Alloh, urang meunangkeun kadua kabagjaan nu geus kasebut, nyaéta “sa’adatud-daarain” kabagjaan dunya jeung aherat. Muga urang bisa ngeusian Ramadan ngan henteu kalawan kuantitas poéna, tapi leuwih ti éta urang ogé nengetan kualitas puasa urang.

Hapunteun sabudaya kalepatan kangge sadaya dulur

Refleksi kahirupan

2009-01-28T18:01:00.005+07:00

Poe eta kuring nyorangan mapay mapay jalan sawah, galengan nu baheula mindeung jadi carita pangulinan kuring keur leutik jeung babaturan, sosorodotan dina gawir sawah nu hejo ku jukut, turun ka handap nepi ka baju teh bobolokot ku leutak nu antukna balik dicarekan ku indung bebeakan hehe, ah tapi da dasar bangkelang kuringmah, dicarek sababaraha kali ge tara kapokan, malahan nu ayamah kalah ngahajakeun, naek tangkal jambu, tangkal sawo nu nini, tangkal buah nu tatangga jang ngarujak teu bebeja haha.

Ah nyaan kuringmah mun diinget inget baheula buntangul pisan, kalakuan ciga budak lalaki, teterekelan, maen kaleci duh nepi ka pernah ngarandapan cicing pinuh ku cipanon ngararasakeun kanyeri dina kasur sabulan lantaran labuh tina sapedah nepi ka tulang suku potong hiks, nepi ka teu bisa miluan UAN alias ujian kelulusan basa kelas genep, nya kapaksa w aya guru nu nungguan kuring ngajawab soal di imah (ah tapi angger w teu meunang niron tawa dibejaan, tega pisannya "jelema geuring di titah mikir bereung jeung nyanyautan nyeri tulang hiks"!

Tapi ayeuna kuring geus nyengseung gede, mun ceuk baturmah kuring teh geus parawan heuheuy lain budak bau cikur deui, geus boga kabogoh nu kasep deuih *nya enya atuh, meunya teuing geulismah hiiiy!, geus boga hate ka lalaki (maksud teh duriat ceuk kang Darso mah), nya papakean ge geus aya ka era, daek make nu ririmbil saeutikmah teu ciga baheula ngan sakur mamake kaos sangsang rek ulin teh haha (cape deh, hereudang atuh da).

Duh nyeblak hate ninggali ngeplakna sawah nu keur meujeuhna dipanen, koneng pare nyurucudkeun cimata, inget ka jaman jaman baheula keur meujeuhna baong, sok ngala eceng, nyair impun, ngiluan nguseup (tapi tara wani da sieun oray, ninggalikeun w ti kajauhan), jeung ngala antanan (paragi coel sambel), najan di carek ge ku kolot tapi da neugtreug we hayang, ceuk kang Obama mah “No matter hey said” pokoknamha “maju terus pantat mundur” oops!

Baheula mah enya ge kuring teh Tomboy ceuk si Oneng mah, tapi angger we ari hatemah “feminim” heuheu hayang w meuli Barbie (dibaca berbi ceuk si Enung mah), jeung mun aya kahayang teh olo olo pisan, kudu pok torolong, heu maklum baheula kuring can boga adi awewe, jadi budak panggedena nu ogoan jeung imut imut najan sakapeung amit amit heheh, jeung da baheulamah kaayaan kolot teh lumayan keur aya, hayang meula nanaon ge asal kuringna cageur da dilaksanakeun waelah, Alhamdulillah.

Ayeuna kuring geus gede, kaayaan kolot ge geus beda, nyaa geus kudu kituna w meureun ku gusti Allah teh, da kawas ceuk papatah ge “hirupmah moal salawasna datar, aya mudun jeung tanjakanana”, nya matakna kuring sabisa bisa narimakeun jeung nyukuran nu ayeuna ku kuring dipimilik, da lamun melong kaluhurmah ke ka dupak, melongna mindeung ka handap ngambeh mindeung oge ngusap dada, nyukuran sagala nu ku urang dipimilik ayeuna, da baturmah moal tangtu boga jeung ngapimilik.

Alhamdulillah nun gusti, masih keneh dibere kahirupan jeung kanikmatan nepi ka renghapan ayeuna, moal kaitung jeung moal kawales naon naon nu geus dipaparinan ku Anjeun teh, hampura abi nu tara nyukuran, mopohokeun parentah jeung resep nyiar nyiar dosa…duh hampura gusti.

Tungtungna

2008-11-13T17:44:00.002+07:00

mieling eling hate sorangan
yen ngan ukur balebat anjeun nu nyari
tapi geuning hate kuring uget
gelenyu imut manehna muragkeun satia

duh kudu kumaha
hate ku bingung
rek milih saha, anu mana
Milu mere harepan duana
teu bisa nimbang nimbang rasa

kuring ngadalinding dina hiji peuting
sorana beuki leungit kasileup jangkrik
hanjakal jangkrik teu bisa mere jawab
ngan ukur bisa muragkeun deui cimata

keun bae, tungtungna ngan ukur jadi carita